Ақсораң етегіндегі ерекше ауыл

Алаш арыстарының алтын бесігіне айналған Ақтоғай ауда­нының Шабанбай би ауылы «Үздік туристік ауыл» атан­­ғанын естіп, Арқа жұрты бөркін аспанға атты. Ақжол­тай жаңалықты «Kazakh Tourism» ұлттық компания­сы сүйіншіледі.

Ақтоғайға шетелден туристер жиі келеді. Ертеден солай. Жыл өткен сайын Беғазы-Дәндібайдың мәдени ескерткіштеріне қызығу­шылық танытатын туристер тіп­ті көбейіп отыр. Онымен қоса Алаш көсемі Әлихан Бөкей­хан­ның туған топырағына тәу ететіндер де көп. Арқаның ең биік нүктесі Ақсораңның биігін бағын­дырғысы келетіндердің де қатары артқан көрінеді.

Туризм сарапшысы Жазира Жанкина «шетелдік туристер қа­зір тамылжыған табиғат іздеп, тау мен тас аралағаннан гөрі елдің көне тарихын көп білгісі келеді», дейді.

– Бізге шетелдерден турист көп келеді. Әсіресе елші­ліктермен тығыз жұмыс істей­міз. Еуропалықтарды этноту­ризм, экотуризм қатты қызық­тырады. Қарағанды облысында алыс­тан келген меймандарды апаруға болатын жер көп. Әсіресе Ақтоғай ауданындағы Беғазы-Дәндібайды іздеп келетін мейман саны жыл сайын өсуде. Саяхатшылар бұл жердің тарихын интернеттен оқып алады да, көруге құштарлығы артады. Тиісінше бізге жүгінеді. Өзім жол бастап талай мейманды Ақтоғай елінің ғажап жерлері, тарихи мекендерімен таныстырып, алғысын арқалап қайтқанмын. Бұрын Ақтоғайдың өз басына жету мұң болатын. Жолы ойдым-ойдым. Қазір жол тақтайдай. Туризм дамуы үшін ең алдымен сапалы жол керек. Жақсы жол шаршатпайды. Енді Ақтоғайдан Қараталға дейінгі жолға асфальт төселсе, тіпті керемет болар еді, – дейді Жазира Құрмашқызы.